Asalaamu calaykum, salaan ka dib haddii ay dhab tahay oo reer Sayla ay Hargeysa ka taageen calankii aan ku hoognay, kun jeer ayaan ka raaligelinayaa reer Somaliland, anigoo aad uga xun falkaas foosha xun ee aan looga baran beesha. Waxan xusuustay wiil yar oo aan ilma´adeer nahay oo 14 jir ahaa maalintii Hargeysa la soo galay oo toos ugu biiray SNM, kaas oo aan ilaa hadda la ogayn meel uu ku shihiiday. Su´aashu waxa ay tahay qaraabadiisii murugo intee le´eg ayay dareemayaan marka ay arkaan tolkood oo taagaya calankii ay ku waayeen wiilkoodii curad???

Madaxweynaheena mudane AMM sidii beeshu ugu listay ugumuu hambayn, waxase waajib diini ah innagu ah in aynu taageerno.

Haddii dawladda lagu saleeyay abaalmarinta degaanada taageerada xoogga leh siiyay Kulmiye, waa lagu gafay beesha. Haddii dawladda lagu dhisay qaab beeleedna waa lagu gafay beesha.

 Dadku waxa ay ka hadlayaan maalmahan oo dhan maxaa qabiil walba wasiir u rabaa? Waa run oo waa in aynu ka korno arrintaas, laakiin arrinta beelaha yaryari waa mid ka duwan ta beelaha waaweyn.

Beelaha yaryar cusuriyad gaar ah ayaa waligoodba lagu hayay mana aha mid gaar immika loogu eedaynayo mudane AMM. Tusaale ahaan waligeed lama arag wasiir reer Sayla ah, su´aashuna waxay tahay miyaa laga waayay Dr. Hebel ama Sh. Hebel? Maya, jawaabtu waxa weeye waa la yasayaa, waana mid ay ka siman yihiin oo ay isku wada raacsan yhiin beelaha waaweyni.

Sayla waxan leeyahay Siilaanyo immika meel uu ka noqdo ma joogo oo haddii uu wasiir ku siiyo beelaha kalena way kacayaan oo dalku wuu innaga dhabqayaaye, maanta sharaf ku dhimo oo samir sadkaaga roon ma ogide.

Beelaha waaweyna waxan leeyahay inta aad boobteen wasiiradii haddana mareegaha ha ku canaananina beelaha yaryar idinkoo iska dhigaya muwaadiniin ka fayow qabiil. Waxa kale oo aad ogaataan in beelaha yaryari ay waligoodba maalaan muruqooda ee aanay ahayn dawlad ku nool sida beelaha waaweyn.

Ilaahayoow soomaali ka dawee qabyaalad aamiin. Somaliland ha noolaato, ha guulaysato!

Khadar Axmed Barkhad

Accountant

Local government officer Örebro, Sweden

waryee@hotmail.com