Qormooyinkan aynu ugu magac-darnay Hidde-raac, waxa ay bar bilaw u yihiin qoraallo door ah oo faaqidaya suugaanta kale geddisan ee uu curiyay Abwaan Siciid Maxamuud Gahayr (Hargeysaawi) oo ka mid hal-abuurrada iyo qoraayada dhallinyarada ah ee Somaliland, oo tiriryay maansooyin ka hadlaya dhinacyo kala geddisan oo nolosha ah.

Gabaygan aqooni waa ilays ee ugu horreeya taxanaha hidde-raac:hilin-sooyaalka iyo hawraarta Siciid Maxamuud Gahayr, waxa uu hal-abuurku kaga waramayaa aqoonta qiimaheeda iyo qaayaheeda badan , iyo sida ay lagama maarmaan u thay barashadeedu , waxa

kale oo uu ku tibaaxayaa jahliga iyo edadafkiisa, taas oo uu ka eegayo horumarka cilmigu, isaga oo cuskanaya aayado quraan ah iyo axaadiis shariif ah,

waxaanu yidhi.

1. Afku wuxuu tibaaxaa xogtii, uurku kaydsado?e
2. Intihoodka shaygaad rabtaad, eray ku qeexdaaye
3. Uunyahaw abbartaydan daya, ararna soo dhaafa

4. Jahli waa abaar baahsan iyo, omosyo jiilaale
5. Mugdigay asxaab wada yihiin, ehel wadaagaane
6. Ambabaxa dad wuu kala taga,a aabbo iyo wiile
7. Eddadaa fariintay dirtiyo, deexo odayadeedba
8. Haddii aan awooddaadu karin, dhuuxa ubucdooda
9. Iin weeye xaajiyo sirtii, aad asturahaysay
10. Ood ummdada gaadhsiisidoo, lana ogaadaaye
11. Akhriskoo laguu fiiriyaa, waa indho la?aane

12. Waxa horumar aasaasa oo, qaran adkaysiiya
13. Asaaggood waxaa dhaafin kara, kana awaaraynba
14. Aqoontiyo darkeedoon, kolnaba laga ilduufayne
15. Anfaceedu waa tuulan yahay, aayaheeduba e
16. Waa edadaf tii biinaysee, oodda kaa rogiye
17. Ilays weeye kuu laacayiyo, nalal iftiin wayne
18. Waa ilo xareed soo rogoo, oon ka ciidama e
19. Waa iliilad maan caawisoon, kana istaagayne
20. Waa ayro geeloo dhashoo, abid irmaanaane
21. Iniin weeye biqilkeed gob yahay, ubaxna soo saarta
22. Anshaxaaga waa tii bishee, toosin edebtaaye
23. Irrid weeye laga galo samaa, awdda xumayaale
24. Ammaaniyo wanaag yeelo buu, yahay odhaahdeede
25. Eexdiyo waxay diidaysaa, iin qabiil dhalo?e

26. Ehelkeedu waa hayb wanaag lagu asteeyaaye
27. Arligooda waa qaar waxtara, oo abaal guda e
28. Dhaqaaluhu markii uu itaal, iyo awood beelo
29. Sicirbaraku goortuu unkamo, ee ibtilo yeedho
30. Hurgumada waxaa aasi kara, ruux aqoon u lahe
31. Aafaadka cudurkii hadduu, aagag ka dillaaco
32. Allaheen gadaashii digtoor, yaan u orodnaaye
33. Aqal dhisida aalado casriya, laydhka agabkiisa
34. Injineerka doorkiisu waa, lama illaawaane
35. Arrimaha shareecada haddii, loo ilbixinaayo
36. Culimada afkooduu Raxmaan, nagu ilhaanshaaye
37. Itaaliya hadduu joogo iyo, Ayrishkiyo Kuuba
38. Iiraan haddii uu ka dago, dhulal Imaaraada
39. Ingiriisi ruuxii bartaan, abid qaloonayne
40. Alxamduda haddii aanad baran, alif illaa nuunka
41. Inkastood aroortiyo habeen, oogtid faralkaaga
42. Salaaddaan marnaba kaa ansixin, oon aqbala noqone

43. Eebbada sideedii marbaad, aar ku gudataaye
44. Ooy cadawga oofaha jartaa, kaa arjumaysaaye
45. Aminta iyo goortuu Jabbaan, amar ku taagleeyay
46. Aasiya kolkii uu ku fiday, aagaggaas bariga
47. Beeral waaki Axad weeraree, eeday kibirkiiye
48. Waxa adhaxda laba qaar ka dhigay, oofna ka wareemay
49. Atamada yuraaniyam raggii, soo adeegsadaye
50. Dabadeed abaabulid saxiyo, himilo aadoo dhan
51. Uurkoodi goortuu tashaday, idil ahaantoodba
52. Ee ay ilaaqdii lasheen, erayadii beena
53. Ee ubax tacliimeed mar kale, olole loo qaaday
54. Nagasaak dib baa loo alkumay, lana ahaysiiye
55. Intay fooq alluubeena waad, la ashqaraartaaye
56. Inaguna haddaan guul asala, uurka kala guuxi
57. Illinkaas inaan wada marnaa, waa hal eeg marine
58. Urursada tacliintoo xafida idil ahaantiiba

59. Shar ninkii amaamudayay baa, eeda goor darane
60. Ruuxii abqaalaan duruus, eedahayn sabane
61. Inanka iyo gabadhii la rabo, inuu ilwaad yeesho
62. Anfac iyo qofkii lala damcuun, aayatiin hiraya
63. Waa ayga loo foofiyuun, arahda waabariye
64. Ufada iyo fooruhu wuxuu, samada uugaamo
65. Onkodkaas dayaamaa wuxuu, naga dul eedaamo
66. Wakhtiguu ibaa soo furto, ee abshiri hoorto
67. Doogyada udgoonbaa judhii, soo awaal baxa e
68. Ardaygii wax lagu soo tabcoo, erayo loo sheego
69. Eedaadna uu soo samroo, jiidho oogahana
70. Bulshadiisa amin buu u noqon, udub dhexaadkiiye
71. Madaxnimo kolbaa astayn, lana adeecaaye
72. Agaasime marbaa loo suntaa, aaday heer kore e
73. Ixtiraam maruunbuu helaa, sharafna ootaaye
74. Urursada tacliitoo xafida idil ahaantiinba

75. Islaamnimadu way dhiirisaa, agab tacliimeede
76. Aayaadku siday qeexayaan, ruux aqoonyahana
77. Iyo jaahilkaan la is ag dhigin kala ishaar dheere
78. Illimada waxbarasheed qofkii, ku amaba qaadaaya
79. Iridaha janneed buu Casiis, aad yar mariyaaye
80. Shiinaha haddii lagu ogyahay, waaba arad dhaw we
81. Nabigeeni ururshuu na yidhi, hana illaawina e
82. Cilmi aayar lama koobsadoo, waa amuur culuse
83. Eel iyo waxaa loo wajihi, goob argaagaxa e
84. Anfariir in loo qaabilana, wuu istaahilaye
85. Siduu yahay alaabada dukaan, iibka gali waaye
86. Urursada tacliintoo xafida, idil ahaantiinba

87. Adduunyadu mar bay kaa luntaa, amin la waayaaye
88. Mawjado afuufaa bad-goosh, kaga asqaysiine
89. Adhigaagu wuu madhan karaa, wada idloobaaye
90. Aaqoontaase way kula jirtaa, abid dharaaraaye
91. Kolkad ugub tay ee aynigaa, ibo bilaabmaayo
92. Ama aad islaamiyo tihiin, oday da? liicaaya
93. Ee aad ulaa raadsataan, socodna iimoobo
94. Intaan iilka loo guurin wali, aad ifkana joogtid
95. Ee aad ku afar qaadaysaan, oogadan dunida
96. Urursada tacliintoo xafida idil haantiiba

Khadar Maxamed Faarax Rooble

khadarmfr@gmail.com, khadarmfr@hotmail.com